🌸🌼तोर मया के चिन्हा🌼🌸
तोर मया के चिन्हा ल
सुरता के बंधना म पिरो के रखे हों
लुगरा के घिरी सहीन घिरो के रखे हों
तै नई मीलेश ता का होइस
तभो ले मोर मन ल तोर बर अभी ले
थिरो के रखे हों
तोर मया के चिन्हा ल
चिन्हारी रखे हों
मया बर तोर
मोर आलसी दिल ल
बनिहारी रखे हों
तोला मोर जिनगी में अही किके
मोर अंगना में उजयारी रखे हों
तोर सुवागत बर मन के बगीचा
अउ
डगर में मोर मया के फुलवारी रखे हों
तोर मया के चिन्हा ल
आंखी के कजरा बरोबर लगा के रखे हों
तोर खोपा के गजरा असन सजा के रखे हों
अउ
तोरेच चेहरा ल
मोर मन मन्दिर म बसा के रखे हों
सांटी के गुंगरू के आवाज असन
नाम ल तोर गुण-गुणा के रखे हों
मोर पागा के कलगी सहिन लुका के रखे हों
तोर मया के चिन्हा ल
बसंत ऋतु के आमा मौउर बरोबार
मौउरा के रखे हों
अकती के बिहाव लगिन असन
भौंउरा के रखे हों
सावन भादो के झड़ी
सहीन
मोर मया ल तोर बर बरसा के रखे हों
जेठ के घाम असन
बिन पानी के मछली बरोबर
मोर मन ल तोर मया बर
तरसा के रखे हों
फागुन के परसाफुल के लाली असन
मोर घर-द्वार ल रंगा के रखे हों
मोर घर के पहुना बारोबर
तोरेेच रददा जोहत रखे हों
एक झलक देखे बर तोर
गली में भटकत रखे हों
बिन पानी के मोर मया के डोंगा
ल खोवत रखे हों
तोर दिल म मोर मया के
धनहा बोवत रखे हों
मोर मन ल अब्बड
तोरसे मया मतकर कीके टोंकत रखे हों
ये मोर पगला दिल ल
कोन समझही
तभो ले
दिन रात तोरेेच बारे में सोचत रखे हों
तोर मया के चिन्हा ल
Aateshwar Nishad
